Pentastar 3.6-ის ცნობილი პრობლემა — რატომ ცვლიან მფლობელები ქარხნულ პლასტმასის ე.წ. "გოჭას" ალუმინით?

როდესაც Chrysler-მა 2011 წელს Pentastar 3.6 V6 ძრავი წარადგინა, მისი მიზანი იყო თანამედროვე, ეკონომიური და მსუბუქი კონსტრუქციის შექმნა. სწორედ ამიტომ, ზეთის გაგრილების რადიატორისთვის ინჟინრებმა ალუმინის ნაცვლად სპეციალური, მაღალი ტემპერატურისადმი გამძლე პლასტმასის კორპუსი გამოიყენეს.

ეს დეტალი ძრავის ერთ-ერთ ყველაზე ცხელ ზონაში — ცილინდრების რიგებს შორის მდებარე V-ფორმის ძრავის სივრცეში არის განთავსებული, რაზეც მუდმივად მოქმედებს გახურებული ძრავის კომპონენტების ტემპერატურა.

მიუხედავად იმისა, რომ ეს გადაწყვეტილება თავდაპირველად წარმატებულად მიიჩნეოდა, წლების განმავლობაში მუდმივი გაცხელებისა და გაგრილების ციკლების გავლენით პლასტმასის კორპუსი თანდათან დეფორმირდება, იბზარება და საბოლოოდ Pentastar 3.6-ის ერთ-ერთ ყველაზე გავრცელებულ პრობლემად გადაიქცა. 

რა ხდება, როდესაც გაგრილების რადიატორის კორპუსი ზიანდება?   

წლების განმავლობაში მაღალი ტემპერატურისა და მუდმივი თერმული დატვირთვის გავლენით პლასტმასის კორპუსი თანდათან კარგავს სიმტკიცეს. თავდაპირველად ჩნდება უმნიშვნელო მიკრობზარები, რომლებიც ხშირად შეუმჩნეველია, თუმცა დროთა განმავლობაში სწორედ ისინი ხდება ზეთის ან ანტიფრიზის გაჟონვის მიზეზი.

პრობლემის აღმოჩენა ყოველთვის მარტივი არ არის. რადგან კორპუსი ძრავის შუაგულში, V-ფორმის ღრმულშია მოთავსებული, გაჟონილი სითხე ხშირად სწორედ იქ გროვდება და გარედან მაშინვე არ ჩანს. სწორედ ამიტომ ბევრი მფლობელი პრობლემას მხოლოდ მას შემდეგ ამჩნევს, რაც ზეთის ან ანტიფრიზის დონე კლებას იწყებს, ძრავის განყოფილებიდან დამწვარი ზეთის სუნი ჩნდება ან ავტომობილის ქვეშ სითხის კვალი შეინიშნება.

იშვიათ შემთხვევებში დაზიანებამ შესაძლოა უფრო სერიოზული შედეგიც გამოიწვიოს და ზეთისა და ანტიფრიზის არხებს შორის ჰერმეტულობა დაარღვიოს, რაც ამ ორი სითხის ერთმანეთში შერევის რისკს ქმნის.  

რატომ ირჩევს ბევრი მფლობელი ალუმინის კორპუსს?

სწორედ ამ პრობლემების გამო Pentastar 3.6-ის მფლობელების დიდი ნაწილი ქარხნული პლასტმასის კორპუსის ნაცვლად ალუმინის ვერსიას ირჩევს.

ალუმინის კორპუსი გაცილებით უკეთ უძლებს მაღალ ტემპერატურას და დროთა განმავლობაში არ კარგავს სიმტკიცეს ისე, როგორც პლასტმასი. სწორედ ამიტომ, მისი დაყენების შემდეგ განმეორებითი დაზიანების ალბათობა მნიშვნელოვნად მცირდება.

ეს არ ნიშნავს, რომ ალუმინის კორპუსი ავტომობილის მუშაობას ცვლის ან დამატებით სიმძლავრეს მატებს. მისი მთავარი უპირატესობა გამძლეობაა — იმ დეტალის შეცვლა უფრო საიმედო ალტერნატივით, რომელიც Pentastar 3.6-ის ერთ-ერთ ყველაზე ცნობილ სუსტ წერტილად ითვლება. 

თუ თქვენი Jeep, Dodge, Chrysler ან RAM Pentastar 3.6 ძრავით არის აღჭურვილი, ამ დეტალის  მდგომარეობის პერიოდული შემოწმება მომავალში არასაჭირო ხარჯებისა და არასასიამოვნო სიურპრიზების თავიდან აცილებაში დაგეხმარებათ!